Gen 39 | NdeIBE | STEP | Ngalesi isikhathi uJosefa wasewasiwa eGibhithe. UPhothifa, owayengomunye wezikhulu zikaFaro, eyindunankulu yabalindi, wamthenga kuma-Ishmayeli abayibo abamletha khona.

Genesis 39

UJosefa LomkaPhothifa

1 Ngalesi isikhathi uJosefa wasewasiwa eGibhithe. UPhothifa, owayengomunye wezikhulu zikaFaro, eyindunankulu yabalindi, wamthenga kuma-Ishmayeli abayibo abamletha khona.

2 UJehova wayelaye uJosefa, waphumelela, wahlala endlini yenkosi yakhe umGibhithe.

3 Kwathi inkosi yakhe ikubona ukuthi uJehova wayelaye lokuthi uJehova wamphumelelisa kukho konke ayekwenza, 4 uJosefa wasethandeka kuye wasesiba yinceku yakhe. UPhothifa wasembeka ukuba ngumphathi womuzi wakhe kwathi konke ayelakho wakubeka ezandleni zakhe. 5 Kusukela ngesikhathi embeka ukuba ngumphathi womuzi wakhe lakho konke okwakungokwakhe, uJehova wawubusisa umuzi womGibhithe ngenxa kaJosefa. Isibusiso sikaJehova saba phezu kwakho konke uPhothifa ayelakho, loba kusendlini loba kusensimini. 6 Yikho watshiya konke okwakhe ezandleni zikaJosefa; kwathi ngoba uJosefa enguye ophetheyo wakhohlwa ngakho konke ngaphandle kokudla ayekudla. UJosefa lo wayemi kuhle, ebukeka,

7 kwasekusithi ngemva kwesikhathi inkosikazi yenkosi yakhe yathatheka ngoJosefa yathi, “Woza engutsheni lami!”

8 Kodwa wala. Wamtshela wathi, “Njengoba kuyimi engiphetheyo, inkosi yami kayizihluphi ngalutho emzini wayo; yonke into elayo iyibeke ezandleni zami. 9 Kakho omkhulu kulami kulumuzi. Inkosi yami kayingalisi lutho ngaphandle kwakho, ngoba wena ungumkayo. Pho ngingayenza kanjani into embi kanje ngenze isono kuNkulunkulu na?” 10 Kwathi loba wamphikelela uJosefa insuku ngensuku, wala ukulala laye wala lokuthi ahlale laye.

11 Ngolunye usuku wangena endlini ukuqhuba umsebenzi wakhe, izisebenzi zasendlini zingekho phakathi endlini.

12 UmkaPhothifa wambamba ngesigqoko wathi, “Woza engutsheni lami!” Kodwa waphunyuka wabaleka waphuma endlini isigqoko sakhe sasala esandleni sowesifazana.

13 Kwathi ebona ukuthi utshiye isigqoko sakhe esandleni sakhe njalo wabaleka endlini,

14 owesifazana wamemeza izisebenzi zendlini wathi kuzo, “Khangelani, umHebheru lo walethwa lapha ukuzadlala ngathi! Ungene lapha efuna ukulala lami, kodwa ngahlaba umkhosi. 15 Uthe esizwa ngihlaba umkhosi ngidinga uncedo, wasetshiya isigqoko sakhe eceleni kwami wabaleka waphuma endlini.”

16 Wasigcina isigqoko eceleni kwakhe inkosi kaJosefa yaze yabuya ngekhaya.

17 Yikho waseyitshela indaba le wathi: “Isigqili somHebheru lesiyana owasilethela sona sifikile kimi ukuzadlala ngami. 18 Kodwa ngonele ukuthi ngihlabe umkhosi ngidinga uncedo, utshiye isigqoko sakhe eceleni kwami wabaleka waphuma endlini.”

19 Kwathi inkosi yakhe isizwile indaba eyayitshelwa ngumfazi esithi, “Singenze njalo isigqili sakho,” yazonda yabila. 20 Inkosi yakhe uJosefa yamthatha yamphosela entolongweni, indawo lapho okwakutokisiswa khona izibotshwa zenkosi. Kodwa kwathi uJosefa ekhonapho entolongweni, 21 uJehova waba laye; wamenzela umusa wamenza wathandeka emehlweni omphathijele. 22 Kwathi-ke umphathijele wamkhweza wamenza umphathi wabo bonke ababebotshiwe besentolongweni, njalo kwaba nguye okhangele konke okwakusenziwa khona.

23 Umphathijele kazange azihluphe loba ngani eyayiphethwe nguJosefa, ngokuba uJehova wayelaye uJosefa wamupha impumelelo kukho konke ayekwenza.